ਘਰ ਬਾਰ ਦਾ ਹਾਲ ਪੁਛਦੇ ਹੋ?
-ਇਹ ਮੂਲੋਂ ਨਰਕ ਹੈ
ਬਾਲ ਬੱਚੇ ਦੀ ਗੱਲ ਕਰਦੇ ਹੋ?
-ਬੱਸ ਬੇੜਾ ਗਰਕ ਹੈ
ਮੇਰੀ ਛਾਤੀ ਤੇ ਭੁੱਖੇ ਹੀ ਸੌਂਦੇ ਹਨ
ਮੇਰੇ ਕਰੋੜਾਂ ਬੱਚੇ
ਕਰੋੜਾਂ ਧੀਆਂ ਦੀ
ਪਾਟੇ ਚੀਥੜਿਆਂ ਚੋਂ
ਆਬਰੂ ਡੁੱਲਦੀ ਹੈ
ਤੇ ਕੁਝ ਸ਼ੈਤਾਨ
ਸਭ ਕੁਝ ਡਕਾਰ ਜਾਂਦੇ ਹਨ
ਇਹ ਹੈ ਮੇਰੇ ਘਰ ਦਾ ਹਾਲ
ਮੇਰਾ ਹਾਲ
ਬਾਲ ਬੱਚੇ ਦਾ ਹਾਲ
ਪਰ ਅਜੇ ਵੀ ਕੁਝ ਚਲਾਕ ਬੱਚੇ
ਲੋਰੀਆਂ ਦੇਣ ਦੇ ਖਾਨਦਾਨੀ ਮਾਹਰ
ਭੁੱਖਿਆਂ ਨੂੰ ਥਾਪੜ ਰਹੇ ਨੇ
ਤੇ ਲੋਰੀ ਗਾ ਰਹੇ ਨੇ
''ਜੈ ਭਾਰਤ ਗਾਵੋ''
ਤੇ ਸੌਂ ਜਾਵੋ..!!
ਓਮ ਪ੍ਰਕਾਸ਼ ਸ਼ਰਮਾ- 'ਲੱਪ ਚਿਣਗਾਂ ਦੀ'
Subscribe to:
Post Comments (Atom)
No comments:
Post a Comment